ولد الربط - الجزء الثاني - محسن بن نفيسة

ولد الربط - الجزء الثاني - محسن بن نفيسة : أنا جييت للدنيا و راني ما حبيتش نجي  لقيت روحي نجري . حيوان مع ملاين حيوانات خارج من بابا شاطتني القدرة مع وخياني في نفق ظلام لا كلام و لا سلام نتسابقو ندازو هيجوج و ميجوج اللي طايح واللي  يطايح و البقية مكبشين في كركوبة حمراء تتزلبط ما قبلت كان واحد  موش اثنين.... دزوني صوحابي و هربو تحلت الكركوبة  دخلت ما غير  ما عرفت تلقفت وليت مفلقط جيت لأرحام أمي و ركشت و بديت نتبدل و تتغير...و أنا باهت في عجب ربي .. لين نهار تفلقت شكارة و دفق الماء حب يهزني التيار...كبشت بيديا و ساقيا في حيوط الشكارة نسمع في صياح ووه ووه خفت و زدت ركشت نلوج في دبارة... و عامال قوة تجبد فيا.... و تجر ... هي تجبد و انا نجبد...عييت سلمت امري للخالق